Dita Olimpike / Ministrja Kushi: MAS ndjeshmëri të lartë ndaj angazhimit të nxënësve në sport

Dita Olimpike bëri bashkë në sheshin “Nënë Tereza” rreth 150 nxënës nga shkollat “Qemal Stafa”, “Jeronim de Rada” dhe “Hasan Vogli” së bashku me mësuesit e tyre. Në këtë organizim sportiv ku u prezantua Stafeta e Vlerave me flakën dhe rrathët olimpikë, merrnin pjesë Ministrja e Arsimit dhe Sportit Evis Kushi dhe presidenti i KOKSH Fidel Ylli.

Ministrja Kushi falënderoi organizatorët dhe pjesëmarrësit në këtë aktivitet për promovimin e vlerave të sportit, që shërbejnë për një shoqëri më të paqësore e më të shëndetshme.

Gjatë fjalës së saj ministrja shprehu shqetësimin për fëmijët të cilët kalojnë një kohë të gjatë para pajisjeve elektronike, duke shprehur nevojën e përditshme të nxënësve për aktivitet fizik.

Pjesëmarrja e tyre në sport u jep mundësi të rrisin aftësitë fizike dhe ndër-personale. Gjithashtu, sporti është një parandalues i mirë i fenomeneve negative shoqërore për të rinjtë, si bullizmi, përdorimi i drogës dhe alkoolit, demonstrimi i sjelljeve të dhunshme. Ndaj dhe vëmendja dhe ndjeshmëria ndaj zhvillimit të sportit shkollor është mjaft e lartë.

Në politikat e zhvillimit të sportit shkollor, MAS u ka kushtuar një vëmendje të veçantë masivizimit të sportit, rritjes së vlerave sportive dhe gjithëpërfshirjes për të gjitha grup-moshat, përfshirë edhe nxënësit me aftësi ndryshe.

https://www.facebook.com/kushievis/posts/pfbid0RZP9v6ifhUDiVfwH8BRCK5ZDNDNt35PBm9BmaU5V9EZibZThVeFZZDzmeRZohGuKl