Matura Shtetërore: Raportim mbi procesin e administrimit të provimit të Matematikës.

Provimi i matematikës përforcoi edhe një herë standardin e arritur në provimin e “Gjuhës shqipe dhe Letërsisë”, duke shënuar kthesën në drejtim të mirëadministrimit të  Maturës Shtetërore. Ky përkushtim dhe interesim për provimin e Maturës Shtetërore nuk ka qenë asnjëherë në këtë nivel. Rikthimi i dinjitetit këtij provimi shtetëror, është fryt i  punës në skuadër.

Për këtë arsye shpreh mirënjohjen e thellë ndaj gjithë  trupës së administratorëve, stafit të MAS-it, si dhe DAR/ZA-ve. Një falënderim i veçantë shkon për  Postën Shqiptare, Policinë e Shtetit, Ministrinë e Shëndetësisë, ÇEZ, partnerë të cilët na ndihmuan në sigurimin e këtij standardi, si një prej objektivave në drejtim  të arritjes së sigurimit të cilësisë në arsim.

Natyrisht, duhet të kemi parasysh se nuk është e thjeshtë që të bësh kthesë pas  kaq vitesh  abuzimi me Maturën Shtetërore, abuzime që nga  shitja e tezës, keq-menaxhimi pse jo dhe i qëllimshëm, mungesës së korrektësisë etj. Ajo që ne bëmë të mundur dhe do të mundësojmë deri në përfundimin e të gjitha provimeve të Maturës Shtetërore 2014, është vendosja e këtij procesi në kuadrin e një standardi, për këtë  nuk do të ketë kthim prapa.

Shprehim keqardhjen tonë që rreth 50 maturantë, të cilët shkelën Rregulloren e Maturës Shtetërore dhe dispozitat e saj për sa i përket moslejimin e përdorimit të celularëve, etj. Maturantët u njohën paraprakisht me këto rregulla dhe ne i kemi përsëritur e ripërsëritur në çdo kontakt me ta dhe me deklarata për shtyp.

Ne qartësuam çdo aspekt të procesit qysh në fillim, siç ishin “Cutt-off”-i, pesha e mesatares, modalitet e provimit, penalitete të qarta për shkelësit etj. Është e qartë që procese të mirë administruara, transparente dhe që promovojnë meritokracinë, ndërtohen në partneritet të shëndetshëm midis institucioneve dhe shoqërisë, midis institucioneve dhe aktorëve të përfshirë në to. Asgjë nuk mund të realizohet, nëse në këtë partneritet nuk  ka besim reciprok.

Detyra jonë është administrimi me përgjegjësi i procesit dhe realizimi i  transparencës. Ndaj në këtë kuadër po ju njoh me disa prej momenteve më të rëndësishme, lidhur me Maturën Shtetërore 2014, si dhe me disa prej problematikave të hasura gjatë provimit të Matematikës, zhvilluar ditën e djeshme.

Në provimin e detyruar, lënda “Matematikë”, MSH 2014, sesioni i parë, zhvilluar në dt. 09.06.2014,  ishin regjistruar 45,032 maturantë.

Testi u hartua  për 7 ditë nga specialistë lëndorë të AKP-së, përfaqësues të MAS-it, mësues me përvojë dhe u shumëfishua në kushtet e një sigurie dhe sekreti të plotë.

AKP-ja ka qenë nën kujdesin e forcave të policisë përgjatë  gjithë ditëve të hartimit dhe shumëfishimit të testeve.

Testi është mbështetur në programin orientues të lëndës së Matematikës, si edhe nën miratimin e MAS-it.

Testi përmban 25 pyetje (13 me alternativa dhe 12 me zgjidhje), të cilat vlerësojnë objektivat e programit orientues dhe janë në përputhje të plotë me natyrën e pyetjeve që nxënësit kanë ndeshur gjatë gjithë viteve të tyre, të shkollimit.

Testi në total vlerësohet me 50 pikë maksimale.

Testi garanton vlerësimin e nxënësve, sipas aftësive që ata zotërojnë dhe ka tri nivele: Niveli I – 40% – 20 pikë;    Niveli II- 40% -20 pikë;      Niveli III- 20 %    – 10 pikë

Skema e vlerësimit qartëson në mënyrë të detajuar përgjigjet e sakta, me qëllim standardizimin e korrigjimit nga ana e vlerësuesve.

Respektimi i këtyre niveleve nga hartuesit e testit garanton që nxënësit të vlerësohen, sipas aftësive që ata zotërojnë.

Vlerësuesit e testit janë mësues me përvojë, të trajnuar rregullisht nga AKP dhe që përpara fillimit të procesit të korrigjimit do t’i nënshtrohen sërish  një trajnimi të detajuar.

Skema e vlerësimit të testit është e publikuar në faqen e MAS-it dhe AKP-së.

Vlerësimi i testeve fillon në dt.12 Qershor në qendrat e vlerësimit: Tiranë, Elbasan, Shkodër, Korçë dhe Fier.

Shpallja e rezultateve do të bëhet 2 javë pas përfundimit të testit të matematikës.

Nxënësit duhet të marrin 10 pikë (20%) për të qenë kalues.

Shoqërimi i testeve nga AKP, DAR/ZA-të në qendrat e vlerësimit  dhe anasjelltas, u krye në zbatim të rregullores së MSH 2014, si dhe falë bashkëpunimit të shkëlqyer të MAS-it  me Postën Shqiptare dhe Ministrinë e Brendshme.

Hedhja e shortit për caktimin e PAP dhe AS, u krye në orën 6.00 pranë çdo DAR/ZA-je;

Problematikat e shfaqura gjatë procesit të provimit në të gjitha DAR/ZA-të janë si më poshtë vijon:

Nxënës me celularë të kapur gjatë provimit ishin 28 (njëzet e tetë) gjithsej nga të cilët:

ZA Kuçovë – 1 nxënës

DAR Elbasan – 3 nxënës

ZA Bulqizë – 2 nxënës

DAR Lezhë – 1 nxënës

DAR Vlorë – 3 nxënës

DAR Tiranë – 2 nxënës

DAR Kukës – 2 nxënës

DAR Fier – 10 nxënës

ZA Lushnje – 1 nxënës

ZA Krujë – 3 nxënës

Këta maturantë janë pezulluar, siç edhe parashikon Rregullorja e MSH 2014. Koha e pezullimit varion nga fillimi i testimit, në orën 10.00, deri në përfundim të tij, në orën 12.30 kur u konstatuan dhe shkeljet.

Nxënës të kapur me kopje në letër ishin 8 (tetë) në të gjitha DAR/ZA, nga të cilët:

ZA Skrapar – 2 nxënës

DAR Elbasan – 1 nxënës

DAR Shkodër – 1 nxënës

DAR Tirana Qark –  1 nxënës

DAR Durrës – 1 nxënës

ZA Krujë – 1 nxënës

ZA Pukë – 1 nxënës

Gjithashtu, dhe në këto raste është marrë masa e pezullimit të maturantëve, sipas parashikimit të Rregullores të MSH 2014.

Nxënës me teste të dëmtuara (shenja dhe barkod i dëmtuar) ishin 4 (katër) gjithsej.

Nxënës të konstatuar me identitete të rremë ishin 16 (gjashtëmbëdhjetë) : 1 në DAR Berat, 1 në ZA Kavajë, 4 në DAR Kukës, 10 në DAR Durrës.

Nxënës me probleme shëndetësore ishin 2 (dy) gjithsej; 1 nxënës në ZA Mat dhe 1 nxënës në DAR Tirana Qark.

Administratorë të përjashtuar nga procesi për menaxhim jo të rregullt, sipas  Rregullores së MSH, janë konstatuar 13 (trembëdhjetë) administratorë të përjashtuar nga të cilët:

DAR Fier – 1 administrator, DAR Durrës – 3 administratorë, DAR Kukës – 8 administratorë, ZA Pukë – 1 administrator

Për këta administratorë janë marrë masa, sipas Rregullores të MSH 2014 dhe Kodit të Punës.